BAGUIO CITY – Manamnama a sumangbay ditoy siudad ti Baguio ti nasurok 5,700 a turista iti sumaruno a dua a lawas wenno agingga inton tapos, December 31.
Sigun kenni City Tourism Officer Alec Mapalo, ti bilang ket naibasar iti naaprobaran nga aplikasyon dagiti turista iti online registration platform ti Baguio para kadagiti turista a kayatda ti sumarungkar ditoy siudad.
Dinakamatna a kaaduan kadagiti nasao a turista ti sumangpet ditoy siudad inton December 23, 24 ken 26.
Nupay kasta, inaklonna a ti bilang dagiti turista a manamnama a sumangpet ditoy siudad ita a holiday season ket adayo a nababa no idilig iti kadawyan a bilang dagiti turista nga agturturong ditoy Baguio sakbay ti pandemya.
Maipalagip a pinagbalin ti siudad a sag-sangaribo a turista iti innaldaw ti mabalin a makastrek ditoy ita a bulan ken masapul a makompleto dagitoy amin a paglintegan ken pagalagadan.
