BAGUIO CITY – Maipawil ita ti nasurok innem nga oras a panagmaneho dagiti drivers dagiti para-publiko a lugan iti rehion Cordillera.
Nailanad daytoy iti pammilin nga impaulog ti Department of Transportation (DOTr) – Cordillera para kadagiti operators dagiti para-publiko a lugan.
Sigun kenni DOTr – Cordillera Regional Director Atty. Jose Eduardo Natividad, nasken a dua ti driver ti maysa a para-pasahero a lugan wenno agsinnukat ti drivers dagitoy nangruna kadagiti atiddog a biyahe.
Kinunana a maysa daytoy kadagiti addang ti ahensia tapnu maliklikan ti pannakapasamak dagiti aksidente wenno trahedya.
Impasiguradona nga iti kanito a maduktalanda ti panaglabsing ti maysa a driver wenno operator ket dagus a masuspindir ti parangkisa dagitoy.
Innayonna a nainget a sukimaten dagiti enforcers ti ahensia dagiti company logbook dagiti maseknan a kompanya ti lugan tapnu mamonitor no asino dagiti saan nga agtultulnog nga operators.
Kidkiddawen met ti DOTr – Cordillera ti pannakitinnulong dagiti commuters wenno dagiti pasahero tapnu dagusda nga i-report dagiti drivers nga aglablabsing kadagiti nagduduma a linteg-trapiko.
