BAGUIO CITY -Impannakkel ti PDEA-Cordillera ti epektibo a war on drugs iti siudad ti Baguio.
Kasaruno daytoy ti panangpadayaw ti DILG iti Baguio gapu iti nasurok 90% a success rate ti siudad iti kampanya kontra iti iligal a droga.
Sigun kenni PDEA-Cordillera regional director Gil Castro, nangato ti success rate ti siudad iti panakatiliw dagiti adu a high value target a drug personalities a nakalista iti Baguio.
Kinunana a ti kaadu dagiti natiliw a listed high value targets ti maysa a baseline wenno pagbasaran tapnu maibaga no nagballigi ti kampanya kontra iti iligal a droga.
Innayonna nga agtultuloy ti nainget a panangipatungpal ti PDEA, PNP ken NBI kadagiti adbokasiyada kontra iti iligal a droga, partikular ti panangtiliw ken panangpasungbat kadagiti drug personalities; panangduktal ken panangtiliw kadagiti utek ti illegal drug trade iti pagilian ken panangtiliw manen kadagiti mawaywayaan a drug personalities nga agsubli iti sigud nga iligal nga aramid.
Innayon ni Castro a napintas ti kampanya kontra iti iligal a droga iti lokalidad ngem maad-addaan laeng iti parikut no mawayawayaan dagiti matiltilie dagitoy a drug personalities.
Nupay kasta, impasiguradona a tiliwenda metlaeng dagiti nasao nga indibidual no agsubli dagitoy iti sigud nga iligal nga aramid.
