BAGUIO CITY – Dumanon iti nasurok 904.4 hectares a daga iti masakupan ti Baguio ti mabalin a maideklara ken mabigbig kas greenbelt areas wenno protected areas iti siudad.
Sigun kenni City Environment and Parks Management Officer Atty. Rhenan Diwas, dagiti nasao a disso ket immunan a nabigbig kas planting areas iti sidong ti Urban Management Plan ti Baguio.
Kinunana a nabigbig dagiti nasao a disso kalpasan ti panag-survey ken panangimbentaryoda kadagiti disso ditoy siudad a mabalin a pagmulaan kas kadagiti forest reservations, watershed reservations, parke, lote ti gobyerno kadagiti babbarangay a mabalin a maaramid a tree parks, pribado a parke ken dagiti parapubliko a pagadalan.
Inrekomendar met ti City Planning and Development Office ti panangputar ti lokal a konseho iti linteg a mangipalubos iti panang-alad ti gobyerno kadagiti nabigbig a watersheds, parke, tree parks ken dagiti pagtataudan ti suplay ti danum tapnu masalwadan dagitoy manipud iti iligal a panagdappat wenno panagokupar.
Insingasing pay ti nasao nga opisinma ti panakaisayangkat dagiti aktibidad tapnu maisuro ken mapabileg dagiti opisyal ken dagiti umili dagiti barangay iti panakaiwanwan ken panakaimaton dagiti green zones iti masakupanda tapnu maipasigurado ti panakamintinir ken panakasalwad dagitoy.
