BAGUIO CITY – Manamnama a sumangpet ditoy siudad ti Baguio ti ad-adu pay a bakuna kontra iti COVID-19 para iti panakaituloy ti panakabakuna dagiti indibidual nga adda iti kategorya ti A4.
Sigun kenni Mayor Benjamin Magalong, manamnama nga inton sumaruno a lawas ket sumangpet iti siudad dagiti bakuna kontra iti COVID-19 kas iti Sinovac, Gamaleya Sputnik V ken Pfizer.
Immunan a narugian ti panagbakuna kadagiti indibidual iti A4 category idi napalabas a lawas.
Kinunana nga agtultuloy latta agingga iti agdama ti panagbakunada kadagiti saan pay a nabakunaan a karaman iti kategorya ti A1, A2, ken A3
Kagiddan iti daytoy, imbinglay ti mayor nga agtultuloy latta ti information campaign ng isaysayangkat ti lokal a gobyerno ti Baguio tapno maguyugoy pay dagiti dadduma nga umili nga agpabakuna kontra iti COVID-19.
Maibasar iti rekord ti City Health Services Office, dumanonen iti nasurok 95,000 nga indibidual wenno katukad ti 40 percent iti populasyon ti Baguio ti nakaawat ti kompleto bakuna kontra iti COVID-19.
