Nasurok 20 nga iligal a minero ti naispal ken agarup 15 a bangkay ti naala manipud iti nabaybay-an a pagminasan ti balitok idiay South Africa, bayat a nagtultuloy dagiti operasion iti maikadua nga aldaw idi kalman tapno madanon ti ad-adu pay a tattao nga adda iti uneg ti daga iti adu a bulan.
Gapu iti dayta, dumanonen iti 24 ti nailista a pimmusay sipud idi bulan ti Agosto idi rinugian dagiti otoridad a pinapanaw dagiti minero iti lugar nga asideg iti Stilfontein, agarup 140 kilometro iti abagatan a laud ti Johannesburg, sigun kenni police Lieutenant General Tebello Mosikili
Boluntario met nga imikkat ti 1,500 iti nasao a lugar.
Inladawan ni community leader Johannes Qankase a dagiti immikkat ket nakaro ti sakitda, dehydrated unay, ken maimatangan a dandanida a matay.
Maysa a propesional mine rescue company idi kalman ti nangimuntar ti makina a maawagan a Rescue Winder tapno madanon dagiti minero babaen iti abut iti daga.
Sigun kadagiti otoridad, ginasgasut nga indibidual ti adda iti underground ngem saan pay a nalawag ti bilang dagitoy.
Binisita idi kalman dagiti opisial ti gobierno sadiay ti minasan ti balitok ken iti agdama ket agtultuloy ti panagrekober kadagiti na-trap iti uneg ti daga.
