BAGUIO CITY – Nasurok dua a ribo a job vacancies ti manamnama a maidiaya kadagiti agsapsapol ti panggedan iti maangay a maika-122nd Labor Day Jobs Fair a maangay sadiay Baguio Convention Center ken SM City Baguio inton bigat, Mayo 1.
Iti panakiuman ti Bombo Radyo kenni Daryll Ponard, Public Information Officer ti Department of Labor and Employment – Cordillera, tarigagayda a ma-hire on the spot dagiti aplikante rason nga immunan a naangay ti orientation kadagiti participating employers nu sadino naipaganetget kadakuada ti panggep ti maaw-awagan a job fair.
Sigun kenni Ponard, mabalin a makipaset dagiti fresh graduates, kasta met dagiti agsarsarak ti kanayonan wenno sabali pay a career option.
Karaman kadagiti serbisyo a mabalin a serkan dagiti aplikante ti government services, financial intermediation kas ti lending, food industry, hospitality industry, retail industry, educational related services kas ti ESL, kasta met iti construction.
Kagiddan dayta, mapalpalagipan dagiti aplikante nga isaganada dagiti kaskenan a dokumento a kasapulan iti aplikasyon, presentable a panagkawes, panagbalon ti danum, ken kumpiansa iti bagi.
Mainaig iti dayta, dinakamat ti nasao nga opisyal a mabalin dagiti job seeker a bisitaen ti facebook page ti nasao nga ahensya para iti pre-registration tapno maliklikan ti atiddog a pila.
Malaksid iti job fair, maangay metlaeng dagiti daduma pay nga aktibidad kas iti KADIWA ng Pangulo, Government One Stop Shop, legal counseling, health and wellness activity, livelihood awarding, TUPAD payout, ken Government Internship Program (GIP) payout.
Dagiti maangay a programa sadiay Baguio Convention Center ket mangrugi iti alas otso ti agsapa bayat a mangrugi met iti alas nueve ti agsapa dagiti aktibidad a maangay iti kadakkelan a mall ditoy siudad./Bombo Rob Dominguez
