BAGUIO CITY – Nasurok iti 81% kadagiti maladaga ditoy Baguio ti nabakunaan kontra iti polio ken measles-rubella manipud idi October 25 agingga December 8 ti agdama a tawen babaen iti City Health Services Office (CHSO).
Maibasar iti datus ti CHSO, 28,891 nga ubbing wenno 81.78% manipud iti puntirya a 35,327 nga ubbing ti naiyaplikaran ti Oral Polio Vaccine bayat a 24, 470 nga ubbing wenno 81.60% manipud iti puntirya a 29,989 nga ubbing ti naiyaplikaran ti Measles-Rubela Vaccine.
Naipasidong iti Measles-Rubella Oral Polio Vaccine Supplemental Immunization Activity dagiti ubbing nga agtawen ti lima nga agpababa.
Dinakamat ti opisina nga adda dagiti nagserbi a vaccination sites ken adda met dagiti sumagmamano a health workers a nag-door-to-door campaign tapnu mabakunaan dagiti kwalipikado nga ubbing iti barangayda.
Naisayangkat ti panagbakuna kontra iti polio ken measles-rubella iti engero a pagilian kasaruno ti panakailista ti polio outbreak idi June 2019 iti sumagmamano a lugar iti pagilian, partikular iti Metro Manila, Davao, BARMM, Region IV-A, Cebu ken Region III.
