BAGUIO CITY – Ad-adda pay a nagballigi ti agresibo ken awan sarday a kampanya ti Cordillera PNP kontra iti iligal a panagpukan iti kayo.
Nangitunda daytoy iti panakakumpiskar ti 17,050 a nagduduma a lumber wenno kayo nga aggatad ti nasurok P561,000 manipud Marso 1 agingga Abril 12.
Sigun iti Cordillera PNP, resulta daytoy ti 32 nga operasyon kontra iti illegal logging a nagresulta iti panakakemmeg ti innem nga indibidual.
Nakumpiskar ti kaaduan a pidaso ti nagduduma a kayo sadiay Apayao a sinaruno ti Benguet, Mt. Province ken Kalinga.
Naipaima metten dagiti nakumpiskar a kayo kadagiti maseknan nga opisina ti DENR.
Imbilin pay ni PCSupt. Edward Carranza, dadaulo ti Cordillera PNP ti panangpatibker dagiti pulis iti operasyon dagitoy ken intelligence build-up kontra kadagiti personalidad a karaman iti iligal a panagpukan ti kayo tapnu makemmeg ken maibalud dagitoy.
Inyapelana met ti dagus a panangireport ti publiko no adda ti makita dagitoy nga iligal nga aktibidad iti lugarda kas iti illegal logging tapnu dagus a makaresponde dagiti pulis.
