BAGUIO CITY – Nadiskobre ken kinumpiskar dagiti otoridad ti maysa a karton a naglaon kadagiti marijuana bricks nga aggatad ti nasurok P1.6-M iti uneg ti maysa a parapasahero a van sadiay Adonot, Ambuklao, Bokod, Benguet idi kalman.
Kinuna ti pulisya a nakaawatda ti tawag manipud iti barangay tanod ti nasao a lugar seknan iti nasarakan a kontrabando a naabandona iti maysa a parapasahero a van a nagtaud sadiay Tabuk City, Kalinga.
Iti panagresponde dagiti pulis, nasarakan ti nasao a karton a naglaon ti 14 a kilo ti marijuana bricks.
Maibasar iti salaysay ti driver ti nasao a van, nangisayangkat daytoy ti routine inspection kadagiti bagahe a naikabil iti luganna.
Nupay kasta, sadiay metten a nadlawna ti mapagduadua-an a karton ken iti panangsukimatna iti daytoy ket nakitana dagiti marijuana bricks a nangitunda tapnu iyumanna kadagiti maseknan nga opisyales.
Iti agdama, agtultuloy ti nainget a checkpoint operasyon kadagiti amin a kalsada pastrek ken paruar iti Benguet tapnu maliklikan ti panaka-aramat ti probinsia kas gateway wenno dalan iti panakaibiahe dagiti iligal a droga.
