BAGUIO CITY – Ngimmato iti 70 a porsiento ti pakabuklan a multa a nakolektar manipud kadagiti nakemmeg a motorista a naglabsing kadagiti linteg trapiko idi napalabas a tawen 2017 no idilig idi 2016.
Maibasar iti rekord ti Traffic Enforcement Unit (TEU) ti Baguio City Police Office, iti entero a 2017 ket agarup 41,000 dagiti motorista a nakemmegda a naglabsing iti nagduduma a linteg trapiko ken daytoy ket katukad ti nasurok P11.9-M a multa.
Nangatngato ti nasao a gatad ti multa no idilig iti nasurok P7.9-M a nakolektar manipud kadagiti nasurok 32,000 a motorista a nanglabsing iti linteg-trapiko iti entero a 2016.
Naamuan a kaaduan kadagitoy ket natiliw idi Oktobre ken Nobyembre bayat nga iti bulan ti Enero ti nakailistaan ti kabassitan a nakemmeg dagitoy.
Kangrunaan met a panaglabsing iti linteg-trapiko ti saan a panagsurot iti traffic command, sign and symbol; obstruction ken illegal parking.
Impannakkel ni PCI Denver Guzman, deputy traffic chief ti siudad a resulta daytoy ti nainget nga implementasyonda kadagiti linteg-trapiko.
