BAGUIO CITY- Pakabuklan a P120.41-M a gatad dagiti marijuana plants ti dinadael ti nagtipon a pwersa dagiti otoridad iti serye ti tallo nga aldaw nga eradication operation a naawagan ti Oplan Herodotus 2 kadagiti probinsia ti Benguet ken Kalinga.
Naisayangkat ti operasyon iti communal forest sadiay Batangan, Tacadang, Kibungan, Benguet ken kadagiti kabambantayan ti Buscalan, Tulgao ken Chumanchill ti Butbut Proper sadiay Tinglayan, Kalinga manipud Sabado, Pebrero 26 agingga idi kalman, Pebrero 28.
Kabayatan ti operasyon, nadiskobre dagiti 16 a pagmulaan ti marijuana nga addaan pakabuklan a kalawa nga agarup 51,500 square meters.
Naparut ken nauram kadagitoy ti 586,450 a puon dagiti dadakkel a marijuana malaksid iti nasarakan a 5 kilograms ti napagango a puon ti marijuana ken 20 kilograms a marijuana fruiting tops.
Naisayangkat ti serye ti operasyon kas paset ti agtultuloy a kampanya ti gobyerno kontra iti iligal a droga.
