BAGUIO CITY – Nakemmeg ti tallo a turista gapu iti panangibiaheda iti 18 a pidaso ti marijuana bricks kabayatan ti Semana Santa iti checkpoint operation sadiay Cheta, Bontoc Ili, Bontoc, Mt. Province nga insayangkat ti PDEA-Cordillera.
Maibasar iti report, manarimaan ti checkpoint operation dagiti operatiba idi nakaawatda ti impormasyon manipud iti maseknan nga umili mainaig iti parapasahero a jeep manipud Tinglayan, Kalinga a paturong sadiay Bontoc, Mt Province a nagluganan dagiti nasao a turista a nakaimet ti marijuana.
Nagresulta daytoy iti panakakemmeg dagiti tallo a lallaki a nabigbig a da Paolalphiny Canilao Octavio, 22-anyos; Jaden Rongavilla Residuo, 22-anyos ken John Loyd Ocampo Rojales, 23-anyos, bin-ig a baro, awanan trabaho ken residente ti Muntinlupa City.
Nakumpiskar iti backpacks dagiti suspek ti 18 a pidaso ti marijuana bricks, 4 a tubulars ti napagango a bulong ti marijuana ken maysa a tooter tube a naglaon ti residue ti napagango a bulong ti marijuana.
Agdagsen amin dagitoy ti agarup nasurok 20,000 grams nga aggatad ti mapattapatta a nasurok P2.4-M.
Sumangsango ita dagiti suspek iti kaso a panaglabsing iti Comprehensive Dangerous Drugs Act of 2002.
