BAGUIO CITY – Agtultuloy ti marijuana eradication operations dagiti otoridad kadagiti kabambantayan ti Tinglayan, Kalinga kasaruno ti gandat a panangiruar dagiti tallo a turista iti minilyon a pisos a gatad dagiti marijuana bricks idi napalabas a lawas.
Sigun kenni PDEA-Cordillera regional director Gil Castro, naisayangkat ti dua nga aldaw nga operasyon babaen iti Oplan Linis Barangay 18 ti PDEA-Kalinga ken Oplan 06 Golf Fumaruwan ti Kalinga Police Provincial Office.
Pakabuklan a siyam a plantation sites dagiti fully grown marijuana plants ti nadiskobre dagiti operatiba idi June 23-24 kadagiti kabambantayan ti Barangay Loccong ken Barangay Buscalan.
Pakabuklan met a P59,030,000 ti gatad dagiti marijuana a pinarut ken inuram dagiti otoridad iti nasao nga operasyon.
Immuna a nadiskobre ti innem a pagmulaan sadiay Buscalan, Tinglayan a nakadadaelan ti P13.73-M a gatad dagiti 68,650 a fully-grown marijuana plants
Simmaruno a nadiskobre iti kaabay daytoy a Barangay Loccong ti kanayonan a tallo a pagmulaan a nakadadaelan dagiti fully-grown marijuana plants nga aggatad ti P45.3-M.
Nupay kasta, awan ti nakemmeg nga indibidual kadagiti nasao nga operasyon.
Maipalagip nga idi napalabas a lawas ket nakumpiskar sadiay Bontoc, Mountain Province ti 53 a pidaso ti marijuana bricks nga aggatad ti P6.36-M a naduktalan a nagtaud sadiay Kalinga ken imet dagitoy dagiti tallo a taga-Cavite.
