BAGUIO CITY – Dumanon iti nasurok P7-M ti gatad dagiti marijuana a pinarut ken inuram dagiti otoridad kadagiti munisipyo ti Kibungan, Bakun ken Kapangan sadiay Benguet.
Sigun kenni Police Regional Office Cordillera regional director PBGen. Israel Ephraim Dickson, resulta daytoy iti uppat nga aldaw a marijuana eradication operations iti panagrugi ti baro a tawen a paset ti agresibo a kampanya ti gobyerno kontra iti iligal a droga.
Kinunana nga idi kalman ket pinarut dagiti otoridad ti agarup P2.9-M a gatad ti marijuana iti 11 a plantation sites sadiay Moling, Palina, Kibungan, Benguet.
Naparut met ti nasurok P3.2-M a gatad ti marijuana sadiay Tubongan, Kayapa, Bakun ken sadiay Gotgoto, Beleng Belis, Kapangan, Benguet.
Nadiskobre pay ti P378-K a gatad ti marijuana sadiay Namalilian, Kayapa, Bakun, Benguet bayat a nadiskobre ti P624-K a gatad ti marijuana ken dried marijuana stalks sadiay Dupinas, Palina, Kibungan, Benguet.
Nupay kasta, awan ti marijuana cultivator a nakemmeg dagiti operatiba.
Pinuuran dagiti operatiba dagiti nasao a kontrabando iti lugar a nangparutanda kadagitoy malaksid iti inalada a sample ti iligal a mula.
