BAGUIO CITY- Nainget ita nga iwanwanawan ti Kibungan Municipal Police Station dagiti nasusulinek ken adayo a barangay sadiay Kibungan, Benguet.
Karaman ditoy ti barangay Tacadang ken Badew a kadawyan a pakadisdiskobrean ti marijuana plantation.
Iti panakiuman ti Bombo Radyo Baguio, kinuna ni P.Lt. Efren Anapen, dadaulo ti Kibungan MPS, a nagsasaruno ti marijuana eradication dagitoy nangrugi idi enero agingga ita a bulan.
Dinakamatna nga idi Mayo 28 ket adda ti nadiskobreda a fully-grown marijuana ken marijuana seedlings malaksid pay iti 90-K ti gatadna a marijuana plants nga inuram dagitoy idi Mayo 27.
Inaklonna a karit kadakuada ti kinaadayo dagiti disso a pakaimulmulaan dagiti marijuana ngem pagyamyamananna ti kongresista ti Benguet gapu iti indonarna a drown a nangpalaka iti operasyon dagitoy.
Nupay apektado dagiti daduma a barangay iti iligal a droga, impannakel ni Anapen nga aktibo ti koordinasyon dagiti lokal a gobyerno kadakuada.
Tinarigsakna pay ti kinaawan presentia dagiti rebelde a grupo a maysa kadagiti rason nu apay nga agingga ita ket agtaltalinaed a generally peaceful ti Kibungan, Benguet.
