BAGUIO CITY – Impasigurado manen ti Regional Joint Security Control Center ti Cordillera Region ti natalged, napudno ken naannayas nga eleksion iti rehiyon tapnu mabaelan dagiti umili a makapili kadagiti lider dagitoy para iti sumaruno a tallo a tawen.
Inaramid daytoy ti grupo iti kaudian a taripnongda, lima a lawas sakbay ti 2019 midterm elections tapnu mairtengan pay ti nakasaganan a security plans para iti natalged ken patas nga eleksiyon ditoy Cordilleras.
Kinuna ni COMELEC – Cordillera Assistant Regional Director Atty. Vanessa Roncal a tutukanda ti Abra a naipasidong iti red category ti election hotspots gapu iti election-related violence a pakasaritaan ti probinsia a resulta ti nabara a pulitika a paka-ar-aramatan dagiti private armed groups ken sumagmamano a report ti maatap a vote buying.
Sigun met kenni Police BGen. Israel Ephraim Dickson, regional director ti Cordillera PNP, agtultuloy ti panangipatungpal ti pulisya ken militar kadagiti check points ken addaan iti ad-adu a police visibility ita ti Abra.
Naamuan a maysa a component ti police elite Special Action Force ti maiturong sadiay Abra tapnu malapdan wenno maaksionan ti aniaman nga election-related violence sadiay.
Impasigurado met ti militar ti kinasaganada a mangnayon iti pwersa dagiti pulis sadiay ken tutukanda met dagiti komunista a rebelde a posible nga agaramid ti terroristic activities.
