BAGUIO CITY – Insaganan ti Baguio Country Club (BCC) ti coat nga aramaten dagiti pulis nga agserbi a close-in security kadagiti kanidata ti Miss Universe a sumangbay ditoy City of Pines inton bigat.
Segun kenni PCI Johnny Balaki manipud iti operations office ti BCPO, nagparukoden iti bado dagiti pulis nga agbantay a mismo iti uneg ti BCC a pakaangayan ti adu nga aktibidad dagiti beauty queens.
Kinunana a coat and tie ti naibilin nga attire dagiti police officers a madutokan iti uneg ti BCC.
Malaksid iti daytoy, pinilida pay dagiti natatayag ken natataer a pulis nga agserbi a close-in security nga idauloan ni PSupt. Leon Talleo.
Inton bigat ket sabaten dagiti kadete ti Philippine Military Academy dagiti kandidata sadiay Loakan Airport.
Kalpasan daytoy ket agturongda iti DILG office ken agluganda kadagiti minifloats nga agparada agingga iti BCC, ken mammigatda sadiay sakbay ti tree planting, strawberry picking ken arts and culture activities dagitoy.
Malaksid iti daytoy ket idualoanda pay ti maysa nga invitational golf tournament sakbay ti gala dinner, ken ni 3rd runner-up in Miss Universe 2011 Shamcey Supsup ti agserbi a host.
