BAGUIO CITY–Natibtibker ken nasaysayaat a relasyon iti nagbaetan ti pulisya ken simbaan ti kiniddaw ti PNP Chief Maj. Gen. Debold Sinas kenni Diocese of Baguio Bishop Victor Bendico iti panagsarungkarna iti simbaan idi kalman ditoy siudad ti Baguio.
Sigun iti Chief PNP, tarigagayna a maadaanda iti natibtibker a relasyon ken kumunikasyon iti simbaan tapno makatulong dagitoy kadagiti aktibidad ken programa ti simbaan para iti pagsayaatan ti umili ken gobierno.
Malaksid iti dayta, tarigagayda pay nga adda ti kanayon a mangigiya wenno mangpalagip kadakuada iti sasao ti Apo tapno agtalinaed ti napigsa a pammati ken nasayaat a moral dagitoy tapno mailiklikda iti kinadakes a mangdadael iti panagserbida iti umili.
Gapo iti dayta, pinagyamanan ni Bishop Bendico ti Chief PNP ken impasiguradona ti suporta ken panakitinulong ti simbaan Katoliko kadakuada nangruna iti panakaital-o ti pammati ken talek dagitoy iti Dios a namarsua kasta meten iti pannakapatalinaed ti linak ken kapia.
Kabayatanna, nagkiddaw met ti Obispo ken PNP Chief iti tulong wenno panang-asistar kadakuada ti pulisya nangruna iti panagturongda kadagiti adayo a lugar iti probinsiya ti Benguet a mangbisita kadagiti umili nga adayo iti simbaan wenno awanan iti simbaan.
