Tinakderan ni House Committee on Appropriations Chairperson Rep. Mikaela Suansing nga awanan iti insertion wenno pork barrel ti national budget ti agdama a tawen kasta metten iti 2027 national budget.
Impetteng ti nasao nga opisyal a nagbalin met a ‘transparent’ ti napasamak a deliberasyon iti national budget ita a tawen.
Nu maipanggep met iti maisingsingasing a pundo para inton sumaruno a tawen, impettengna a ti panangadal iti NEP ket ada iti hurisdiksyon ti ehekutibo laeng.
Mainaig iti daytoy, nainget a pinaglibakan ni Representative Suansing ti alegasyon nga ada ti nairaman a pork barrel wenno insertion iti singasing a pundo.
Kasaruno daytoy iti panangipaima ti Department of Budget and Management (DBM) ti P7.2 trillion a National Expenditure Program (NEP) iti House of Representatives itay kanikadua.
Immuna metten a kinuwestionaran ti miyembro ti House Justice Committee a n Rep. Terry Ridon ti alegasyon nga ada ti insertion iti 2027 budget nupay saan pay laeng a nangrugrugi ti deliberasyon ti komite.
Sakbay daytoy, kinuna ni Baguio City Mayor Benjamin Magalong iti maysa nga interview a sumagmamano kadagiti mammanday linteg nga agnumnumar kadagiti budget insertions ket paset iti House prosecution panel iti impeachment ni VP Sara Duterte.
Gapu iti daytoy, kinarit ni Ridon ti mayor nga inagananna dagiti dakdakamaten daytoy nga ada pakainaiganna iti insertion iti pondo. Iti baet dayta, impetteng ni Ridon nga agtalianaed da latta a nakapokus iti trabaho da. //bombokaren.c.sapirao