BAGUIO CITY- Pinili ti Philippine Sports Commission (PSC) ti siudad ti Baguio a pakaisayangkatan ti national championships ti Batang Pinoy wenno Philippine Youth Games ita a tawen.
Sigun kenni Mayor Mauricio Domogan, nailanad daytoy iti surat ni PSC Chairman William “Butch” Ramirez iti lokal a gobyerno ti Baguio.
Maangay ti Batang Pinoy National Championships 2018 inton September 15-21.
KInuna ti mayor a nagpaayab daytoy ti taripnong kadagiti maseknan nga opisina ken ahensia tapno mangisayangkatda ti inspeksion kadagiti sports facilities ti siudad.
Nailanad iti surat ni Ramirez a maysa kadagiti responsibilidad ti host a lokal a gobyerno ket ti panakaikoordinar iti pulisya para iti seguridad ti dagiti atleta, playing venues ken dadduma pay.
Karaman pay nga ibaklay ti siudad ti panangipaay iti playing venues, billeting areas ken kanayunan a transportasyon para kadagiti atleta ken coaches dagitoy.
Sigun met kenni City Sports Coordinator Gaudencio Gonzales, nasurok 5,000 nga atleta ti manamnama a sumang-at iti siudad ti para iti nasao a kompetisyon.
Maipalagip nga iti Luzon Leg ti Batang Pinoy ket agtaltalinaed a defending champion ti delegasyon ti siudad ti Baguio.
Ti Batang Pinoy ket ti national youth sports competition ti pagilian para kadagiti atleta nga agtawen iti 15 a pababa a paspasetan dagiti out-of-school youths.
