BAGUIO CITY – Rugianen ti Philippine Statistics Authority (PSA) ti panagirehistroda para iti Philippine Identification System iti innem a probinsia ken dua a siudad ti rehion Cordillera.
Sigun kenni PSA-Cordillera Regional Director Villafe Alibuyog, inisyal a puntiryada iti umuna a rikos ti nasao a rehistrasyon ket agarup 280,000 nga indibidual iti entero a rehion.
Kinunana a mangrugi ti panagparehistroda inton March 31 ken maipangruna ditoy dagiti nakukurapay a pagtaengan ken dagiti lugar nga addaan ti nababa a kaso ti COVID-19.
Linawlawaganna a mairehistro met amin a kwalipikado nga aplikante tapnu awan ti maibati.
Impasiguradona met laeng ti saan a panakaibutaktak iti publiko dagiti impormasyon nga ipaay dagiti mairehistro.
Puntirya ti Philippine Identification System a maipaayan iti maymaysa a national ID ti amin a Pilipino ken dagiti gangannaet nga agnanaeden ditoy Pilipinas kas pammaneknek iti kinasiasino ti tunggal maysa.
Maitunos pay daytoy iti Republic Act No. 11055 wenno ti Philippine Identification System Act.