BAGUIO CITY – Nakemmeg sadiay Tabuk City, Kalinga ti maysa a national-listed ken regional-listed most wanted person kalpasan ti panaglemlemmeng daytoy iti las-ud ti nasurok uppat a dekada.
Nabigbig daytoy a ni Jaime Tochok Bulatao, 77-anyos ken residente ti Butbut Proper, Tinglayan, Kalinga.
Sigun kenni PCol. Davy Vicente Limmong, dadaulo ti Kalinga Police Provincial Office, ni Bulatao ket addaan ti patong iti ulo a P75,000.
Kinunana a nakemmeg ni Bulatao babaen kadagiti operatiba ti nagduduma nga yunit ti pulisya iti Rehion Cordillera babaen iti panangiserbida iti warrants of arrest daytoy gapu iti kaso a multiple frustrated murder ken murder.
Maibasar iti rekord, ni Bulatao ti suspek iti panakapapatay daydi Tinglayan Mayor Alexander Alngag idi 1976 bayat a daytoy metlaeng ti suspek iti panakasaneb ni sigud a Rizal Mayor Marcelo Dela Cruz idi 2008.
