Kinumpirmar ni Department of Education (DePEd) Secretary Sonny Angara a maitantantan pay laeng ti naituding a nationwide simultaneous active shooter wenno active-threat drill kadagiti pampubliko ken pribado a pagadalan inton bigat.
Manamnama met a mangiruwar ti nasao nga opisina iti kanayunan a detalye seknan iti pannakaitantan ti nasao nga aktibidada ken nu kaano daytoy a maipatungpal.
Immunan nga impakaammo ti DepEd ti maipanggep iti nationwide simultaneous drill idiay senado no sadino inlawlawag ni DepEd Undersecretary Malcolm Garma a panggep daytoy a paregtaen ti panagsagana, ken proseso ti ‘reunification’ dagiti estudyante ken pamilyada iti kanito a maaddaan iti pangta ti kinaranggas iti uneg ti pagadalan.
Kasaruno daytoy dagiti damag iti pammaltog ken kinaranggas kadagiti pagadalan partikular idiay Tacloban City ken Zamboanga City.
Iti baet dayta, agtultuloy met ti nainget a panagbantay dagiti otoridad iti seguridad kadagiti pagadalan.