BAGUIO CITY – Maisayangkat ti hearing inton March 14 iti opisina ni Land Transportation Franchising and Regulatory Board (LTFRB) chair Martin Delgra III seknan iti petisyon ti maysa a grupo dagiti taxi operators iti entero a pagilian a mangkidkiddaw iti panakasuspindir ti requirement a kasapulan a maimuntar ti uppat a gadgets iti taxi dagitoy sakbay a maipalubos ti panaka-calibrate ti unit dagitoy.
Iti panakiyuman ti Bombo Radyo iti maysa a taxi operator ditoy siudad ti Baguio a miembro ti nasao a grupo, kinunana nga adda ti nationwide petition nga impilada iti national office ti LTFRB seknan iti nasao a banag.
Impalawagna a nagpetisyon dagitoy gaputa iti panagadalda ket nadagsen unay ti nasao a requirement nangruna ta dumanon iti agarup P10,000 agingga P12,000 ti mabusbosda iti panaggatangda iti dash cam, cctv camera, wi-fi ken gps malaksid pay iti binulan a subscription dagitoy para iti load ti wi-fi ken GPS.
Kinunana nga urayenda ti maangay a hearing ken aniaman a resulta ti petisyonda ket isu ti tungpalenda.
Nupay kasta, impettengna nga iti agdama, bayat nga adda ti petisyon dagitoy ket masuspindir pay ti panakaimuntar dagiti gadgets kadagiti taxi ngem maituloy ti calibration dagitoy.
Innayonna a nakasaganda a mangaramid iti undertaking a mangilanad iti karida nga aniaman a desisyon ti petisyonda ket agtungpalda.
Dinakamatna a sadiay Cebu ket ma-calibrate dagiti taxi nga uray dash cam ken digital online platform ti naimuntar iti taxi bayat a sadiay Davao ket awan ti GPS dagitoy ken nagpirmada laeng iti undertaking bayat a sadiay Manila ket awan ti maipatpatungpal a calibration.
Sigun pay iti nasao a taxi operator, ammoda a kagiddan ti panakaipangato ti plete kadagitoy ket nasken met a napintas a serbisyo ti ipaayda kadagiti pasahero dagitoy.
