Nangipaulog manen ti National Bureau of Investigation (NBI) idi laeng kalman ti subpoena kenni Vice President Sara Duterte a mangipalubos kenkuana a mangilawlawag ti kinunana itay kallabes nga adda ti binilinna nga indibidual a mangpapatay kenni President Ferdinand Marcos Jr. nu matay daytoy. Kinumpirmar daytoy ni NBI Director Jaime Santiago.
Nakalanad iti subpoena nga agparang daytoy inton Disiembre a onse iti agdama a tawen.
Ni Vice President Sara Duterte ket maim-imbestigaran gapu iti mapapati a pangtana nga adda pakainaginna iti Cybercrime Prevention Act of 2012 ken posible a panaglabsing iti Anti-Terrorism Act of 2020 kalpasan ti mapapati a kill order na kontra iti Presidente, First Lady Liza Araneta-Marcos, ken Speaker Martin Romualdez.
Immunan a naipaayan ti nasao nga opisial ti subpoena tapno ilawlawagna ti nasao a banag ngem saan a nakadar-ay daytoy idi Nobiembre 29.
Kiniddaw ti kampona ti pannakaiskediul manen ti panangilawlawagna gaputa naladaw a naamuanna a naitantan ti House committee hearing a naituding a pagparanganna.
Kiniddawna pay ti kopia ti reklamo ken dadduma pay a dokumento tapno maisayangkat ti imbestigasion, kasta metten ti listaan ti damag ti NBI a naituding a damagenda kenkuana.
Nupay kasta, saan nga impaay ti NBI ti listaan ti damag.
Immunan a kinuna ni Vice President Sara a ti kinunana kontra iti First Couple ken Romualdez ket “maliciously taken out of logical context.”
