Impakaamo ti National Bureau of Investigation (NBI) a silulukatda a mangimbestigar iti kinuna ni sigud a President Rodrigo Duterte maipapan iti panangpapatay kadagiti senador, ngem no laeng dagiti mammanday-linteg ti mangipila iti reklamo.
Daytoy ti kinuna ni NBI Director Jaime Santiago kalpasan a nangipila iti reklamo ti police Criminal Investigation and Detection Group (CIDG) gapu iti “sedition” ken maikontra iti linteg a panagsasao kontra kenni Duterte.
Ti kaso ket adda itan iti Department of Justice (DOJ), ken maad-adal paylaeng ti sumaruno nga addang, sigun kenni Santiago.
Maipalagip a bayat ti proclamation rally ti Partido ng Demokratiko Pilipino Lakas ng Bayan (PDP-Laban) idi Pebrero 13, kinuna gamin ni sigud a President Rodrigo Duterte a pattayenna dagiti sangapulo ket lima a senador tapno mabakantean ken makastrek dagiti amin nga inyendorsona a senador.
