BAGUIO CITY – Mangrugin ti 45-day negotiation process iti nagbaetan ti negotiating team ti lokal a gobyerno ti Baguio ken dagiti panakabagi ti SM Prime Holdings, Inc. a nakaipaayan ti Original Proponent Status (OPS) para iti maisaksakad a market development project ti siudad.
Sigun kenni Mayor Benjamin Magalong, mangrugi ti negosasyon iti masungad nga al-aldaw tapnu mabukel ti terms of reference para iti implementasyon ti nabayagen a matartarigagayan a panakapasayaat ti pasilidad ti merkado publiko ti Baguio.
Kinunana nga ur-urayenna laengen ti aksion ti lokal a konseho iti immuna a kiddawna a panakapalawa ti membership ti Public-Private Partnership for the People Committee ti lokal a gobyerno tapnu mairaman iti negotiating team dagiti dadduma a miembro ti komunidad.
Apaman a maawatna ti aksion ti lokal a konseho iti kiddawna ket dagus nga ipaulog ni Mayor Magalong ti kaskenan a pammilin para iti daytoy tapnu marugianen ti proseso ti negosasyon.
Impanamnama pay ni Mayor Magalong nga agbalin a transparent ti panakaisayangkat ti negosasyon tapnu ammo dagiti tattao ti siudad ti mapaspasamak.
Maipalagip a tarigagay ti agdama nga administrasyon a mapagbalin ti merkado publiko ti Baguio kas maysa kadagiti kamoderno-an a merkado publiko iti abagatan daya ti Asya.
