BAGUIO CITY–Napalpaltogan ti maysa a negosyante iti uneg ti luganna iti sangwanan ti balayda sadiay Purok 11, Phase 2 Ciudad Grande, Bakakeng Sur, Baguio City idi rabii.
Nabigbig daytoy a ni Dexter Balancio De Guzman, 42-anyos, naasawaan, negosyante ken residente ti nasao a lugar.
Maibasar iti report, inlukat ti kasambahay ti gate ti balay ti biktima tapnu iserrekna ti lugan daytoy.
Nupay kasta, nakangngeg laengen ti nasao a kasambahay iti tallo a nagsasaruno a putok ti paltog ken nakitana laengen ti biktima a nakatugaw iti sangwanan ti lugan daytoy.
Dagus a nagpa-arayat ti nasao a nasao a kasambahay ken intaray iti pagagasan ti maysa a maseknan nga umili ti nasao a biktima.
Nagsagrap ti negosyante iti adu a tama ti bala ti paltog.
Nangisayangkat dagiti pulis iti panagrikos iti nasao a disso ngem napaay dagitoy a nangkemmeg iti suspek.
