BAGUIO CITY – Pimmusay ti maysa a negosyante kalpasan a pinalpaltogan daytoy dagiti saan pay a nabigbig a suspek iti national road, Km.3, Pico, La Trinidad, Benguet idi rabii.
Nabigbig daytoy a ni Roberto Dumagat Obidos, agtawen iti limapulo keT dua, real state broker, tubo ti Leyte ken residente ti Puguis, La Trinidad, Benguet.
Maibasar iti blotter ti pulisya, naamuan nga adda ti biktima iti uneg ti luganna a red Inova idi pinalpaltogan daytoy dagiti saan pay a nabigbig a suspek a dagus met laeng a naglibas kalpasan ti insidente.
Naitaray ti biktima iti ospital ngem naideklara a dead on arrival.
Naamuan a nagsagrap ti biktima iti dua a tama ti paltog iti tengnged daytoy.
Narekober met ti SOCO ti maysa a basyo ken maysa a buli ti saan pay a nabigbig a kalibre ti paltog iti nakapasamakan ti insidente.
Kabayatanna, maysa kadagiti kitkitaen nga anggulo dagiti otoridad iti napasamak a krimen ket posible nga adda pakainaigan daytoy iti negosyo.
Maipaspasidong metten iti panagrepaso ti CCTV footage a naala manipud iti CCTV a nakamuntar iti establisyemento nga asideg iti nakapasamakan ti krimen.
