BAGUIO CITY – Sumangsango iti nagtutuon a kaso ti maysa a negosyante gapu iti sekswal a panang-abusona iti maysa a menor-de-edad a lalaki sadiay Phase 3, Bakakeng Norte, Baguio City.
Maibasar iti report ti pulisya, agkabbalay ti suspek a lalaki a negosyante ken ti biktimana a maysa metlaeng a lalaki.
Naduktalan iti imbestigasion a ginuyugoy ti suspek ti biktima nga agnaed iti balayna sadiay Bakakeng Norte ditoy siudad ti Baguio tapno pagadalen ken suportarana daytoy iti pinansial.
Gapu iti daytoy, simmurot ken nakipagnaed ti biktima iti suspek.
Nupay kasta, naduktalan a molmolestiyaen ken sekswaal nga ab-abusuen ti suspek ti menor-de-edad iti las-ud ti makabulan.
Maibasar iti reklamo ti biktima, nangrugi nga ab-abusuen daytoy ti negosyante idi pay Hunyo 8 agingga Agosto 8 ti agdama a tawen.
Inaklon ti biktima a naladaw nga inyumanna kadagiti otoridad ti nasao a pakaseknan gapu iti nakaro a butengna agingga a naaddaaan daytoy iti tured nga agipulong kadagiti pulis.
Iti agdama ket naipilan ti kaso a panagrames ken panaglabsing iti Special Protection of Children Against Child Abuse, Exploitation and Discrimination Act kontra iti suspek.
