BAGUIO CITY – Inyusuaten ti lokal a gobyerno ti Baguio ken ti Department of Trade and Industry (DTI) – Baguio-Benguet ti Negosyo Center a mangipaay serbisyo kadagiti rinibribo a micro, small and medium enterprises (MSMEs) ditoy siudad.
Indauluan da Mayor Mauricio Domogan ken DTI-Cordillera Regional Director Myrna Pablo ti ceremonial launching ti nasao a pasilidad.
Binigbig met ti mayor ti pagkasapulan para iti nasao a pasilidad kagiddan ti panangkunana a ti numero uno a pagtataudan ti revenue ti siudad ket iti business licensing unit ti Baguio.
Immuna iti daytoy, kinuna ti DTI nga agtultuloy ti panangipasdekda kadagiti Negosyo Centers iti rehiyon.
Kinuna ni Engr. Lino Cungihan, manager ti Negosyo Center ti DTI – Baguio-Benguet a babaen iti nasao a pasilidad ket adda ti agserbi iti business sector ti siudad ti Baguio.
Kangrunaan nga akem ti Negosyo Center ti mangipaay iti tulong kadagiti kliyente nga agparehistro iti negosyo, partikular dagiti Barangay Micro Business Enterprises, iti panagparehistro ti business name ken dadduma pay.
