Naituding nga agturong wenno bumissita ni New Zealand Deputy Prime Minister ken Foreign Affairs Minister Rt. Hon. Winston Peters iti Pilipinas inton umay a lawas tapno pagsasaritaan ti panangpapigsa iti “bilateral relations” ken panangparang-ay iti panagtitinnulong iti ballasiw-taaw para iti nagduduma a tay-ak.
Sigun iti Department of Foreign Affairs (DFA), ni Peters ket makipagkinnita kenni Foreign Affairs Secretary Enrique Manalo.
Ni Peters ket naituding a saksianna ti panagpirma ti katulagan iti nagbaetan ti Anti-Red Tape Authority (ARTA) ken ti New Zealand Enterprise on Ease of Doing Business.
Ti naituding a panagbisita ti nasao nga opisial ket gapu iti maika-innem a pulo nga anibersario ti pannakaipasdek ti diplomatiko a relasion iti nagbaetan ti dua a pagilian inton Hulio 2026.
Bimmisita ni New Zealand Prime Minister Christopher Luxon iti Pilipinas idi Abril nu sadinno nakipagkita daytoy kenni President Ferdinand “Bongbong” Marcos Jr., nu sadinno ad-adalen ti dua a pagilian iti maipapan iti agdama a “bilateral migrant worker arrangements” para iti panag-recruit kadagiti overseas Filipino workers (OFWs).
Nagpagsaritaan pay ti dua a dadaulo ti posible nga “investment” kadagiti sektor a kas ti dairy, karne, kayo, ken teknolohia karaman ti pribado a sektor.
