Nangrugen a mangegan dagiti tukar wenno sonata pang Paskua kagiddan ti panagserrek ti bulan ti Setyembre.
Mangipasimudaag daytoy iti mapadpadaan a namaris ken naragsak nga holiday season a pagaayat a ramrambakan dagiti tattao.
Gapu iti maibagbaga nga holiday spirit ket maimatangan manen dagiti panagado dagiti mendicants wenno agpalpalama a nagtaud kadagiti kabangibang a probinsya.
Dagitoy a grupo wenno indibidual ket dagiti kakailyan nga Aeta manipud Zambales, dagiti Badjao a nagtaud idiay Visayas, dagiti natataengan a nagtaud manipud iti nagduduma a probinsya iti Cordillera ken dadduma pay.
Saan kuman nga urayen ti lokal a gobierno ti Baguio City babaen iti opisina ti City Social Welfare Office nga umado ken agkaiwara da manen kadagiti kangrunaan a kalsada ditoy suidad nga agdawdawat ti kwarta.
Sumrek da pay kadagiti nagduduma a pasdek, panganan wenno restaurants tapno buriburin ti publiko imet-imet da nu dadduma dagiti anak da tapno laeng dunawat ti pang Paskua.
Ti rigat na ket dagitoy a mendicants wenno agpalpalama ket “choosy” wenno managpili a saan da pay nga alan dagiti maited kadakuada a taraon wenno kagawaan kas iti bado ken kawes.
Malaksid iti panagbalin da nga eyesore kadagiti kalkalsda ken pasdek negosyo ket mangipaay da pay iti peggad iti kalsada babaen iti panagdawat da kadagiti lumabas a motorista.
Saan kuma nga itulok dagiti otoridad ti panagado da manen sakbay da nga agtignay babaen iti panagsita da kadakuada.
Iparikna kuma dagiti otoridad ti ordinansa a maiparit ti agpalama nu sadino kasapulan a mapilaan ti kaso ken mamulta dagiti asinoman nga aglabsing tapno saanen daytoy a tuladen dagiti dadduma.//Bombo Jordan Tablac
