Naituding a gumatang ti National Food Authority (NFA) iti siam a pulo a baro a “truck” ita a tawen, iti panangikagumaanna a maikkan dagiti mannalon, agraman dagiti adda iti nasulinek a lugar, iti gundaway a mangilako kadagiti produktoda iti ahensia, a naikeddeng a gumatang iti agarup 880,000 metric tons a pagay (unmilled rice) ita a tawen.
Panggep pay ti Department of Agriculture (DA) a gumatang iti kanayonan a 150 a “truck” inton tawen 2026.
Inaklon ni Agriculture Secretary Francisco Tiu Laurel Jr., a masapul a maisubli ti pannakabalin ti National Food Authority (NFA) a mangregulate iti panagtagilako iti bagas ken ad-adda nga epektibo ti panangtarawidwid kadagiti stock.
Ti pakabuklan a palay inventory ti nasao nga ahensia ket dumanon iti 399,701 metric tons agingga idi Pebrero 2025.
Umdasen a mangsaklaw iti walo nga aldaw a suplay, a mangmarka iti panagrang-ay manipud iti maysa laeng nga aldaw sakbay ti panangidaulo ni NFA administrator Larry lacson.
Iti sidong ti mandato, nadutukan ti National Food Authority a mangmintinir iti umdas a rice buffer stocks nga ipaaymanipod kadagiti lokal a mannalon.
