BAGUIO CITY- Maal-alarma ita ti Local civil registration ti Baguio City kasaruno iti ngimmatuan ti bilang dagiti agtutubo a nagsikog iti agdama a tawen nu idilig idi napalabas a tawen.
Maibasar iti report, dumanon iti 46 percent ti ngimatuan ti bilang dagiti ubbing a nag-anak iti umuna a kwarter ti agdama a tawen
Iti datos, nangatngato daytoy iti 45.94 percent nu idilig iti 74 a maladaga a nga inyanak dagiti ubbing a nagbalin nga ina iti umuna a kwarter ti napalabas a tawen.
Sigun ken City Local Civil Registrar Luz Perez, dumanon iti 108 a maladaga ti inyanak dagiti ubbing nga agtawen iti 15 agingga 19 manipod Enero 2022 agingga Abril 2022.
Kinunana nga agtawen iti 13 ti kaubingan a nagbalin nga ina.
Kabayatanna, nailista iti syudad ti 1, 379 a live births iti umuna a kwarter a nakaobserbaran iti bassit a ngimatuan nu idilig iti 1, 293 a live birth iti kapada a panawen idi napalabas a tawen.
Mainaig pay iti dayta, kinunana nga iti benneg ti legitimacy, dumanon iti 48.08 percent ti naireport a legitimate bayat a 51.92 percent dagiti naiyanak nga illegitimate wenno naiyanak a saan a nagkallaysa dagiti nagannakda.
