BAGUIO CITY – Mabalin nga aglukat kas resto bars wenno dine-in establishments dagiti night establishments wenno dagiti night bars ditoy siudad ti Baguio.
Sigun kenni City Permits and Licensing Division Head Allan Abayao, naipaka-ammon daytoy kadagiti agarup 120 a bar owners, operators, in-house bands ken masseurs iti panakitaripnongda kadagitoy.
Nailanad iti pagalagadan ti gobyerno a karaman latta dagiti night clubs ken night bars kadagiti saan pay a napalubusan nga aglukat iti agdama a pandemya.
Inlawlawag ni Abayao a kas alternatibo ket mabalin nga aglukat dagiti night bars kas ‘resto bars’ ken dine-in establishments a mabalin a mangiserbi ti arak.
Innayonna nga ipaulog to ni Mayor Benjamin Magalong ti maysa a pammilin a pakailanadan dagiti pagalagadan ken checklist a masurot iti operasyon dagiti resto bars.
Naamuan a nakapilan para iti panagaprobar ti City Inter-Agency Task Force dagiti pagaladagan iti panagtungpal kadagiti health protocols ken ti panakapirma ti undertaking wenno commitment para iti nasao nga operasyon.
Maisayangkat met ti joint inspections kadagiti maseknan a pasdek sakbay ti panaglukat manen dagitoy, pakairamanan dagiti allied performances kas iti live band, acoustic ken videoke tapnu maipasigurado ti panagtungpal dagitoy iti amin a health protocols.
Saan met a mapalubusan ti panaglukat dagiti nigh establishments nga awanan ti business permits.
