BAGUIO CITY – Mailukat manen ti nalatak a night market sadiay Harrison Road ditoy siudad ti Baguio inton bigat, December 11.
Sigun kenni Baguio City Public Market Superintendent Fernando Ragma Jr., daytoy ket kalpasan nga inaprubaran ni Mayor Benjamin Magalong ti plano nga insagana dagiti otoridad para iti naur-urnos nga operasyon ti night market.
Kinunana a 352 a pwesto ti mapalubusan iti night market ken buklen daytoy ti 304 a pwesto para iti dry goods ken 48 a pwesto para iti taraon.
Dinakamatna a ti bilang dagiti mapalubosan nga agpwesto iti night market ket nasurok 33% iti pakabuklan a bilang dagiti pwesto a naipalubos nga aglukat sadiay sakbay ti agdama a pandemya.
Innayonna nga adda ti nabigbig nga agserbi nga entry ken exit points bayat a malimitaran iti 300 agingga 350 nga inbidual dagiti mapastrek sadiay tapnu nalaka nga iwanwan dagiti maiwaras nga agbantay.
Kinuna pay ni Ragma a masurot latta dagiti paglintegan kontra iti COVID-19 ken mamulta ti asinoman nga aglabsing kadagitoy.
Agtalinaed met ti operasyon ti night market nga 8:30-11:00 iti rabii.
