BAGUIO CITY – Puntirya ti lokal a gobierno ti Baguio City nga ilukat manen ti night market sadiay Harrison Road inton December 1, 2020.
Sigun kenni Baguio Market Superintendent Fernando Ragma Jr., addan ti pammalubos ni Mayor Benjamin Magalong iti panagtuloy ti operasion ti night market a maitunos kadagiti nainget a pagalagadan tapno malapdan ti panagwaras ti COVID-19.
Kinunana pay a naipadanonen iti opisina ti Mayor dagiti pagalagadan mainaig iti nasao nga operasion para iti approval daytoy.
Narugianen ti panagpintor ken panaka-urnos dagiti lighting systems iti paset ti Harrison Road babaen iti City Engineering Office.
Plano a mangrugi ti operasion ti night market iti oras ti 8:00PM aginggat 11:30PM, no sadino, 50% laeng kadagiti vendors ti mapalubosan nga aglukat tunggal lawas.
Magudua iti dua a grupo dagiti vendors a bukbuklen ti 481 concessionaires a pakairamanan ti 433 dry goods ken 48 food business.
