Nalpasen nga insurat ni President Ferdinand Marcos Jr. ti nilaon ti speechna para iti maikatlo nga State of the Nation Address(SONA) daytoy inton bigat.
Sigun kenni President Marcos Jr., “fine-tuning” laengin ti ar-aramidenda nu sadino, inaklonna a marigatan daytoy a mangiraman kadagiti amin a napapateg a pakaseknan a masapol a mai-address iti panagbitlana.
Kinunana nga adu dagiti problema a kayatna a talantanen ngem kasapulan ti at-atiddog nga oras.
Nupay kasta, impasiguradona nga iremremedyo dagiti maseknan nga opisyales tapno mailawlawag iti publiko ti ipangpangruna ti agdama nga administrasyon.
Kabayatanna, impeksa met ni House Speaker Ferdinand Martin Romualdez ti gagarna a mangdengngeg iti panagbitla ti presidente.
Kinuna ni Romualdez nga awan ti detalye a maibinglayna seknan iti nilaon ti speech ti presidente ngem kumpiansa daytoy nga ekselente ti ipaay ni President Marcos Jr.
