BAGUIO CITY- Nakemmeg ti No. 1 Top Most Wanted Person ti Municipal Level ti Itogon Municipal Police Station a sumangsango iti kaso a panaglabsing iti RA 7610 wenno ti Anti-Child Abuse.
Nabigbig daytoy a ni Reyno Mendoza, 30-anyos, sigud a miembro ti Cordillera Peoples Liberation Army ken residente ti Tuding,Itogon, Benguet.
Naamuan a sumangsango daytoy iti nasao a kaso gapu iti panagbekkelna iti menor de edad nga annakna.
Sigun kenni PCI Eugene Raymundo, hepe ti Itogon PNP, nasalawda ti nasao a wanted person a nakalugan iti maysa a jeep babaen iti naisayangkat a checkpoint sadiay Naiba, Tuding, Itogon, Benguet.
Kinunana a nabayagen a wanwanawanda ti nasao nga indibidual kalpasan a naiyetnag ti arrest warrant daytoy idi pay nalapabas a tawen.
Malaksid iti immuna a kaso daytoy, naipilaan manen daytoy kapada a kaso kalpasan a sinipatna ti kaanakan daytoy idi met laeng kalman kalpasan nga ak-akusaranna ti kaanankanna a daytoy ti mangipaapy iti impormasion kadagiti pulis nu sadino ti paglemlemmengan daytoy.
Innayonna a sumangsango pay daytoy iti kaso a panaglabsing iti Article 179 ti Revised Penal Code gaputa natiliwan a nakasuot iti athletic uniform dagiti pulis.
Iti agdama ket maisagsagana ti kaso daytoy sakbay a maiturn-over iti maseknan a korte ken iti panakaibalud daytoy.