BAGUIO CITY – Natiliw ti indibidual a nakalista a maikatlo a Most Wanted Person iti Station Level iti Baguio City Police Office (BCPO) – Station 3 para iti maikadua a kwarter ti agdama a tawen, 2021.
Nabigbig daytoy a ni Job Johann Tumada Calano, 43-anyos, OFW ken residente ti Baguio City.
Natiliw daytoy sadiay City Camp Lagoon, Lower Rock Quarry, Baguio City itay laeng nabiit babaen iti bileg dagiti warrants of arrest para iti kasona a lima a bilang ti estafa ken walo a bilang ti panaglabsing iti Article 177 ti Revised Penal Code wenno ti usurpation of authority.
Impaulog ti nagduduma a korte dagiti warrants of arrest ni Calano ken addaan pakabuklan a piyansa a P1.38-M.
Naduktalan iti imbestigasyon dagiti pulis a nagpammarang ni Calano kas maysa nga agent ti NBI ken maatap nga agpampammarang a doktor tapnu makaawis iti kliyente.
Nupay kasta, napaay daytoy a mangiparang iti aniaman a pammaneknek kadagiti nasao a propesyon.
Iti agdama, nakabaluden ti nasao nga indibidual.
