BAGUIO CITY – Supsuportaran ti maysa a transport group ditoy lokalidad ti pammilin ti lokal a gobierno ti Baguio City a “no bakuna, no biahe”, mangrugi inton November 10, aldaw ti Miyerkules.
Iti panakiyuman ti Bombo Radyo Baguio, kinuna ni Patricio Evangelista, dadaulo ti transport group iti Cordillera ken Region 1 a saan a mapabasol ti lokal a gobierno gaputa nabayagen a maidiadiaya ken maiyaw-awis ti panagpabakuna dagitoy.
Impettengna a nabayagen nga inraman ti siudad dagiti transport group nga agnumar iti suplay ti bakuna ngem sumagmamano kadagitoy ti agkedked pailaeng nga agpabakuna.
Impaganetgetna a pagsayaatan metlaeng daytoy dagiti drivers ken operators gaputa maprotektaran ti salun-atda, pamilyada ken pasaheroda kontra COVID-19.
Gapu iti daytoy, al-alukoyenna dagiti drivers ken operators ditoy lokalidad nga agpabakuna tapno agtultuloy ti panagbiahe dagitoy.
Kabayatana, ipatungpal ti lokal a gobierno ti random inspection kadagiti Public Utility Vehicles nga agbiahe kadagiti kangrunaan a ruta iti Baguio City inton Nobyembre 11, aldaw ti Huwebes.
Kasaruno daytoy iti pammilin ti mayor iti siudad a dagiti laeng agbiahe a PUVs inton November 10m ket dagiti nabakunaan kontra COVID-19.
Sigun iti mayor, kinasaritada pay dagiti opisyales ti transport group seknan iti panakaimandato ti panagpabakuna dagiti drivers banag nga inaprubaran dagitoy.
Impetteng ti mayor a bassit laeng ti saan a nabakunaan iti transport sektor ditoy lokalidad isu’t gapuna a naipaayan dagitoy iti pawayway nga agpabakuna tapno makabiahe dagitoy mangrugi inton Miyerkules.
Inlawlawagna a kasapulan ti panagpabakuna dagiti drivers gaputa kas maibasar iti datus ket maysa dagitoy a pakailislistaan ti kaso ti COVID-19.
