Pagaamo ti siudad ti Baguio iti napintas ken nadalus nga aglawlaw iti publiko, ken pagaamo metlaeng kas modelo kontra iti “epal” nga aramid wenno ti panangipablaak ti nagan ken ladawan iti politiko kadagiti proyekto iti lokal a gobierno.
Sakbay pay man ti Anti-Epal a linteg ti nasional a gobierno, adda metten ti lokal a linteg iti siudad mangipaw-pawil iti kapada nga aramid. Panggep daytoy a maipasigurado a ti tunggal proyekto ket para iti publiko, saan a para iti personal a promosion iti siasinoman a politiko wenno pribado nga indibidual.
Idi tawen 2012, naipasa ti Ordinansa Blg. 33-2012, wenno ti “No-Naming and No-Signage on Public Works and Properties Ordinance.” Iti agdama, panggep ni Baguio City Councilor Fred Bagbagen a palawaen pay ti saklaw daytoy, tapno nalawag ti definition iti “epal,” ken mairaman dagiti pribado a sanikua, poster, tarpaulin, signage, ken dadduma pay a materiales a maar-aramat iti ruar nga opisial a panawen ti panagkampania.
Sigun kenni Bagbagen, saan laeng daytoy a maipapan iti linteg wenno multa nu duket maipapan iti talek iti publiko, ken kinadalus iti aglawlaw. Impaganetgetna a ti parapubliko a proyekto ket para iti tao, saan a para iti siasinoman a politiko.
