BAGUIO-Ipalpalagip manen ni La Trinidad Mayor Romeo Salda ti “no touch-down policy” para kadagiti chicken dung truckers ken vegetable truckers a sumsumrek ken rumrumwar iti masakupan ti munisipyo.
Sigun kenkuana, masursurot ti nasao a paglintegan kadagiti trading areas iti La Trinidad ken sadiay Manila tapnu saanen a kasapulan a bumaba iti trak dagiti driver ken pahenante dagitoy iti kanito nga agibaba wenno agkargada ti nateng ken rugit ti manok.
Kinunana nga adda dagiti utilities kas kadagiti porter wenno packer a mangamong iti panakaidiskarga dagiti linaon dagiti trak tapnu awan ti mapasamak a direct contact.
Maipalagip a naipatungpal ti nasao a polisiya kasaruno ti panagpositibo iti COVID-19 ti dua a pahinante ti trading post ken ti maysa a truck driver manipod Tuba nga addaan ti travel history sadiay Manila.
Innayon ni Mayor Salda ti pagkasapulan para iti panagaramat dagiti truck drivers iti logbook a pangilistaanda iti nagturturonganda nangruna dagiti nagbiahe kadagiti high-risk areas iti COVID-19.
Dinakamatna pay a no adda ti pagkasapulan dagiti truck driver wenno pahinante ket ti trader ti mangited kadagitoy.
