BAGUIO CITY – Epektibon ditoy siudad ti Baguio ti polisiya a ‘No Vaccine, No Ride’.
Kagiddan daytoy ti panakapasidong iti Alert Level 3 dagiti probinsia ken siudad iti rehion Cordillera, malaksid laeng iti Apayao.
Iti panakiuman ti Bombo Radyo Baguio, inaklon ni Baguio City Police Office (BCPO) – Public Information Officer PLtCol. Judy Jasmin Palicos nga adun ti nasitar ken napasublida nga indibidual kadagiti quarantine checkpoints kalpasan a masukimat a saan dagitoy a nabakunaan kontra iti COVID-19.
Inkalinteganna a ti polisiya ket nakalanad iti pammilin ti IATF kadagiti lugar a naipasidong iti Alert Level 3.
Inyunay-unayna a masukimat amin dagiti panggepda ti agbiyahe pastrek wenno paturong ditoy siudad pakairamanan dagiti residente ti La Trinidad, Itogon, Sablan, Tublay ken Tuba wenno ti LISTT Area.
Impalagipna pay a nasken a mapaka-ammoan met dagiti umili kadagiti kaudian a pammilin nangruna kadagiti maipatpatungpal a pagalagadan kas panagridam iti panagwaras pay ti COVID-19.
