Impila ni House Majority Leader Sandro Marcos ti House Bill (HB) No. 7432 wenno ti “No Work, No Pay for Members of Congress Act” para kadagiti amin a mammanday-linteg.
Iti explanatory note daytoy, nailawlawag a ti prinsipyo ti “no work, no pay” ket para kadagiti amin a mammanday-linteg. Maysa met laeng kadagiti panggep ni nasao a linteg ket tapno masigurado a masagid laeng ti pondo ti pagilian nu ar-aramiden dagiti opisyal dagiti trabaho dagitoy.
Iti sidung ti nasao a singasing, mabayadan laeng dagiti mammanday-linteg iti aktwal nga aldaw nga present dagitoy kadagiti opisyal nga aktibidades kas iti hearings iti plenaryo, hearing iti nagduduma a komite, ken dadduma pay.
No met kasapulan nga ag-abset dagitoy gapu iti salun-at, mangiparang dagitoy kadagiti sertipiko, wennno anyaman nga opisyal nga representasyon.
Tapno adda iti transparency ti nasao a direktiba, adda ti madutokan kas sekretaryat ti Senado ken Kamara a mangmonitor iti innaldaw nga attendance no sadino ket mabalin metlaeng daytoy a kitaen ti publiko.
Mapatawan met iti disiplina dagiti maduktalan nga aglabsing kadagiti pagalagadan iti nasao a singasing kas iti panangpeke iti attendance.
Sigun kenni Marcos, maysa daytoy a misconduct ken sumango amin nga aglabsing iti kaskenan a disiplina maibasar iti patakaran ti Kongreso.
Namnamaen met ni Marcos ti dagud a pannakapapigsa ti nasao a singasing gapu ta sigun kenkuana, mangipakita daytoy iti kari ti Kongreso nga aramidenda dagiti trabahoda tapno mapagserbiyanda dagiti Pilipino. // Bombo Karen Calpoe Sapirao
