BAGUIO CITY – Temporaryo a nasuspindir iti makalawas dagiti non-essential travels wenno saan a napapateg a biyahe a paturong iti siudad ti Baguio.
Epektibo ti nasao a pagalagadan ita nga aldaw, July 31 kas maibasar iti pammilin nga impaulog ni Mayor Benjamin Magalog.
Maitunos daytoy iti impaulog ti Malakanyang a mangipaspasidong iti siudad iti General Community Quarantine iti intero nga Agosto.
Nailanad pay iti pammilin ti saan pay a panangawat ti siudad kadagiti non-APOR a pakairamanan dagiti turista manipud kadagiti lugar a naipasidong iti aniaman a quarantine classification.
Inlawlawag ni Mayor Magalong nga addang daytoy ti lokal a gobierno tapno malapdan ti posible nga iseserrek ti Delta variant ti coronavirus iti lokalidad.
Maipalagip nga idi kalman, July 30 ket epektibo metten ti pammilin a mangipawpawil kadagiti ubbing nga agturong kadagiti indoor places iti siudad malaksid laeng kadagiti addaan ti makunkuna nga al fresco areas.
Maibalbalakad pay kadagiti residente ti siudad ti pananglimitarda iti panagbiyaheda iti ruar ti lokalidad no saan a napateg unay ti biyahe dagitoy.
