Paris, France- Naglukat manen ti Notre Dame Cathedral idiay Paris, France itay laeng kanikadua kalpasan ti lima ken kagudua a tawen manipod idi nadadael daytoy gapu iti pannakauramna.
Iti interview ti Bombo Radyo kenni Bong Varona, Bombo International News Correspondent idiay Paris, France, kinunana a padpadaanan daytoy dagiti umili idiay Paris kasta metten dagiti umili iti dadduma a pagilian gaputa daytoy manen ti umuna a gundaway a naglukat ti nasao a simbaan.
Sigun kenni Varona, pinagyamanan ni French President Emmanuel Macron dagiti amin a timmulong idi maur-uram ti nasao a pasdek pakairamanan ti lima gasut a “volunteers” gapu iti dagos a panangsebsebda idi nagramaram ti uram.
Iti pannakaisayangkat ti inauguration ceremony itay kanikadua, nakipaset dagiti world leaders pakairamanan ni U.S. President-elect Donald Trump ken ti First Lady, Prince William ti Britain, kasta metten ni Elon Musk, ken dagiti dadduma pay a personalidad, artista ken opisial.
Kinuna ni Varona a ti nasao a simbaan ti kangrunaan a pagturturungan dagiti bisita nangruna dagiti deboto iti Iglesia Katolika.
Maibasar iti datos, dumanon iti maysa a milion tunggal tawen ti agbisbista iti Notre Dame.
Para kenni Varona, dakkel ti nagbaliwan ti Notre Dame ken ad-adda a pimmintas daytoy.
Imbinglayna a dumanon iti walo a gasut a Euros ti naaramat para iti pannakarenovate ti simbaan.
Napasamak ti pannakaibangon ti Notre-Dame de Paris iti nagbaetan ti maika-12 ken maika-14 a siglo, ken agtawen daytoy ti walo gasut innem a pulo.
Kabayatanna, maipalagip nga idi rabii ti Abril 15, 2019, narba ti torre ken atep ti simbaan gapu iti narungsot nga apoy a nangdadael ken nagramaram iti kampana ken intero a pasdek nu sadinno, nabuya daytoy dagiti umili ti Paris ken kasta met dagiti agbuybuya iti telebision.
