BAGUIO CITY – Nagballaag manen iti publiko ti National Telecommunications Commission wenno NTC Cordillera kontra kadagiti indibidual nga agar-aramid iti nagduduma a klase iti text scam.
Sigun kenni NTC CAR Regional Director Mildado Lee, adu dagiti agwarwaras ita a text messages iti publiko a mangidiadiaya iti trabaho, mangibagbaga a dagitoy ket nangabak iti maysa a pasalip wenno recipient kadagiti foundation wenno private organizations.
Balakad ti opisyal, saan a rumbeng a patien dagitoy a text messages nangruna nu saan mo nga am-ammu ti agtagikua iti nasao a numero ken napinpintas nu saan lattan nga ikaskaso dagiti short message service wenno sms.
Innayon pay ti director a kasapulan nga saanen a kasapulan a sungbatan ti numero a nangipaay iti text message ken kapinsatan nga addang nga aramiden ket saanen a suruten ti naipadon a text message nu kasatno a maclaim ti napangabakan a premyo.
Kinuna pay ti opisyal nga marigatan ton ti publiko a marekober ti kwarta a naaramat daytoy iti transaction kadagiti text scammers gapu ta dagus a mapukaw wenno agbalin nga out of coverage ti numero nga inaramat dagiti managgundaway.
